إيه أكتر موقف محرج حصلك في حياتك ؟
سؤال الناس كلها بتسأله كتيرليا … والصراحة أنا بيجي في بالي مواقف كتير جدا لا تعد ولا تحصى … بس أكتر موقف ممكن أحكي عليه الموقف ده
وأنا في هندسة الأسكندرية , وفي رمضان تحديدا .... أتعزم شادي ( صاحبي إلي كان قاعد معايا في الشقة ) على 
المهم ... طنط أصرت أني آجي وحلفت 100 يمين أني حفطر معاهم ... وأنا كنت مكسوف أوي أوي لأني معرفهمش
المهم ... جيه وقت الفطار .... قعدت أنا وشادي وطنط وأبنها وبنتها على مائدة الإفطار !
وأنا قاعد أقول لنفسي " خليك مؤدب " " كل براحة " " كل مما يليك " وكل النصائح إللي أنا دايما بنساها أول لما أشوف أكل 
!
بس المرادي أقسمت أني ححترم نفسي وحاكل براحة وأبقى بني أدم خاصة إن في بنت قاعدة وشكلي لازم برضه يطلع ابن ناس!
المهم أذن المغرب !
وطبعا بما أن في بنت أنا معرفهاش قاعدة فا أنا كنت باصص في الطرابيزة وساكت !
لقيت طنط بتيديني كوباية فيها بلح باللبن بجوز الهند ( وأنا بعشق المزيج ده )!
روحت ماسك المعلقة إللي قدامي ... وخدت معلقة .... لقيته قمة في الطعامة .... روحت نازل فيه ... ولج لج لج لج !
وفجأة لقيت الدنيا سكون .... وأنتو عارفين لما تحسوا أن في حد بيبص عليك !!
أنا طبعا روحت رافع دماغي من الكوباية ... لقيتهم كلهم باصينلي !
في إيه يا جماعة ؟؟
طبعا طنط قالتلي بطريقة ظريفة أن من طقوس الإفطار عنده أن أنا المفروض كنت آخد معلقة أو أتنين أكسر بيها صيامي ... وأدي الكوباية للي جنبي !!
وهيا ( بما أني الضيف ) فا هيا أديتني الكوباية الأول بحيث أستفتح !
وطبعا أنا أستفتحت وختمت 
ولقيت شادي وشه محمر من كتر كتمه في الضحك .... وبنت خاله وشها محمر وأبن خاله بيحاول يعمل نفسه مش واخد باله !
طبعا والله انا لغاية دلوقتي لسة فاكر أن أعصابي سابت وكانت المعلقة قاعدة تتهز مني طول الفطار وكأني ماسك سلك كهربا!
ولغاية دلوقتي ....
مش بفطر عند حد ويديني كوباية لبن بالتمر ... إلا لما أسأل السؤال المقدس ...
" هيا الكوباية ديه ليا لوحدي ؟؟ "
أسامة عفيفي
11/5/2006
