أول مرة أتسرق في جامع !
بصراحة إضايقت جدا !
كنت في شقة أخويا واقف مع السباك ... وقلت أنزل أصلي التراويح في المسجد إللي قدام بيته !
الجامع إللي بعد إللي بعد سوق السيارات !
نزلت وصليت ... وأنا في الشفع الوتر ... قلت ما أعدي على الواد بلوودي العيان وأزوره !
بعد الصلاة ... خارج من الجامع , مالقيتش الكتشي بتاعي !!
الريبوك !
إهئ إهئ !
طبعا رحت قايل لإمام المسجد ... فراح قايلي " ما أنت عارف أن الحاجات بتتسرق "
قلتله : أنا اولا أول مرة أصلي في الجامع ده .... ومش مدي خوانة ... أنتوا حاطين مكان الجزم في آخر الجامع ... وأنت بتقلي أحط حاجتي قدامي ... طب ماتحط بتاعت الجزم قدام !
لقيت واحد تاني بيقول : معلش يابني ... أنت حتروح إزاي ... خد جزمتي أنا ساكن قريب ...
أنا : يافندم ... مش موضوع آخد جزمة حضرتك .... الحرامي ده مش حرامي ... ده قليل الأدب ... يسرق من بيتي عادي ... من بيتك عادي ... إنما من بيت ربنا !!
وفي رمضان ؟ وفي التراويح ؟ طب أعمل إيه أكتر من كده .... أخشله بلبس الإحرام ؟؟
الرجل صاحب الجزمة : حسبي الله ونعم الوكيل ... مصيرنا نمسكه ... خد الجزمة بالله عليك بقى !
أنا : شكرا ... أنا والله ساكن بعيد ... أنا معايا العربية !
طبعا ... من سخرية القدر ... أن أنا كنت حركن العربية قدام باب الجامع بزبط ... بس قلت في نفسي " أتواضع شوية 
" وركنتها بعيد الناحبة التانية من الشارع !
لكم أن تتخيلوني وأنا بعدي الشارع بتاع زاكر حسين بالشراب !!
كان ناقص العيال الصغيرة يجروا ورايا ويرموا عليا طوب ويقولوا " العبيط أهوه 
وطبعا أول مرة أسوق العربية بالشراب .... البنزين بيزغزغ في رجليا !
كل ده ... على شان أنا عقدت النية أني أزور بلوودي ( إبن الأقصى ) !
طبعا كنت حطلع على بيته ... وأنا حافي القدمين ... بس قلت بدل ما أخش على الواد بكيس برتقال ... أخشله حافي ... ناقص كمان يديني 5 جنيه وأنا مروح 
طبعا روحت البيت ... كلمت أختي وقلتلها تستناني بشبشب قدام البيت !
وأول ما دخلت ... زفوني بعاصفة من الضحك على شكلي .... وأبويا وشه إحمر من كتر الضحك !
سيبتهم يضحكوا ويقهقهوا زي ما هما عايزين ....
بعد لما خلصوا ... قلتلهم " هاتوا بقى 300 جنيه على شان أجيب كتشي جديد "
وسادت ساعات من الصمت 
---------------------------------------------
البلوج ده بالمناسبة إتأجل ....
كنت حكتبه ليلة السرقة ... بس قلت أنا حكتبه من هنا .... وألاقي تاني يوم الدفعة كلها بتبص على رجلي !
فإستنيت لما أجيب كتشي جديد !
أصل أنا كنت في المحاضرة ... وكنت لابس كوتشي جربان كدة ومكسوف أطلع برة المدرج !
المهم ... الأخ عزيز لاحظ توتري ... فحكيتله بالمختصر إللي حصل !
متصور أنه بني آدم طيب وغلبان !
قلتله بلاش تفضحني .... قالي من عنايا ... ماتقلقش !
فجأة فلان جيه سلم عليا ... راح قايله " بص على الكوتشي .... نيا ها هاها ها "
كنت حقوم أضربه !
فضحني الله يخرب بيت شيطانك !
ولما زهق من الكلام ... كل لما حد يسلم عليا ... يقوم – مشكورا – مشاورله على الكوتشي !
بس حتروح مني فين ياعزيز ... مسيرك تقع بين إيدايا !
----------------------------------------------
عقدة الكافيهات !
أو الكافيفوبيا !
ده مرض غالبا أنا مصاب بيه !
مش عارف ليه عندي فضول إني أعرف إللي في المنيو كله 
لازم أعمل فضيحة في الكافيه !
مرة كنت مع محي وفيدو ... وقلنا نطلع على سيلينترو ...
طبعا أنا داخل ... وببص للناس وكأن أنا أصلا متربي على سيلينترو !
وجائت اللحظة الحاسمة ... المنيو !
مش فاهم فيها حاجة 
المهم ... قلت أنشن على حاجة ... وأعمل نفسي واد جامد بقى ... وكأن أنا بطلبها منذ نعومة أظافري !
طلبت حاجة كدة ... غالبا سايدر ... أو حاجة على الوزن !
المهم ... بعد لما طلبتها .... قاعد حموت من الفضول على شان أعرف إيه ده !
بعد لما الراجل خد طلبات فيدو ( مش عارف كان طلب موكا غالبا ) ومحي ( شاي ... أصل هوا مش فضولي زيي ) ... قبل لما يمشي سألنا : " حاجة تانية يا شباب ؟ "
أنا مقدرتش أقاوم ... رحت قايل " آه معلش ... هوا إيه السايدر ده حضرتك ؟ "
هو : ده عصير تفاح سخن وعليه كراميل وبندق ّ
أنا : " إيه القرف ده ... تفاح سخن 
... لا ياعم ... عندك إيه بارد ؟ "
طبعا الراجل وكأنه مصمم يعقدني راح قايل : عندنا بركوا وفسفوكا وهمبوكا وفيرامو سيكاما و شاكيما خرقبو بوركينا فسو و قلدابونا وفراولة* و شموارا و ساتبيا و كربوانا و ......
طبعا أنا كنا بعمل كدة :
طبعا بعد لما رصيل ال70 مشروب ... بصيت لمحي وفيدو ... لقيتهم في الرمق الأخير من الضحك !
رحت باصص للراجل وقلتله " أنت في سياق كلامك ... قلت كلمة فراولة ... مش عارف كنت تقصد إيه ؟ "
قالي " ده عصير فراولة مضروب مع آيس "
قلتله " مممم .... هاتوا " ( رغم إني مش من عشاق الفراولة )
قالي: " عايز عليه فموكا ؟ "
أنا : (بعد نظرات متوسلة لمحي وفيدو إللي ماتو من الضحك ) : " حط 
هو : تحب عليه صوص سيبانو
أنا : ممممم ... حط
هو : ومعاه كريم فالكوانا
أنا : مممم .... يعني .... مافيش مشكلة ... حط
والله ياجماعة لو كان قالي عايز معاه مخلل كنت حقله حط برضه !
طبعا قعدت بعديها يجي نص ساعة بحاول أفوق في فيدو ومحي ... الكلاب سايبني مزنوق ... وهما السبب ... أنا قلت أن هما حيعلموني ... طلعوا مش حافظين غير " موكا و شاي " وبعض الأحيان الواد فيدو بيجيب تشيز كيك !!
ولما جت الفاتورة ... كان حساب العصير 8 جنيه ... والإضافات كانت بتاع 20 جنيه
بكرهك ياسلنترو ... وبحبك ياكوستا ياحبيبي ياللي بترجم بالعربي
-----------------------------------------------------------
