حقيقة علمية ....أنا مش بحب السمك البوري .... من أول ماتولدت 
(حقيقة علمية أخرى 
: أنا إبتديت أحبه مؤخرا ...أو بمعنى أصح أعشقه)
والقصة كالآتي :
- عملالك يا أس أس السمك إللي بتحبه
- إيه يا ماما ؟ بجد ربنا يخليكي ... عملتيلي السمك البلطي المقلي 
؟
- لاء
- يبقى أكيد عملتي سمك صيادية 
- لاء
- طب سمك في الفرن 
؟
- لاء
- لا لا لا ....ماتقوليش ...
أخيرا سمك بانيه من إللي أنا بموت فيه
- لاء برضه
- أمال أيه السمك إللي أنا بحبه وناسيه ده؟ 
؟
- جيبتلك بوري مشوي
- بوري مشوي ؟ ده أنا مش بحبــ ..... قصدي ....يااااااااه ... شكرا ياماما ياحبيبتي
بعد مرور إسبوع
- أنا عملتلك يا أس أس السمك إللي بتحبه ؟
- بلطي ؟
- لاء
- ماتقوليليش بوري مشوي ...
- أيوة ...ماله ... مش إنت بتحبه ؟
- من إمتى بحبه ؟ هو إنتو عندوكوا أسامة غيري في البيت ؟ 
هو مين إللي طلع الإشاعة ديه ؟
- أمال إنت مش كلته وعجبك المرة إللي فاتت ؟
- كلته على شان كنت جعان ... مهو أنا برضه بني آدم مش شغال بالطاقة الشمسية
- خلاص المرة إللي جاية حعملهولك
- شكرا
- إيه رأيك في طعمه بقى ؟
- بعد فترة من الصمت - حلو ... شكرا ... تسلم إيديكي ... بس إفتكري إني مش بحبه ... أنا شوية شوية حكتبها في البطاقة !
- بعد مرور شهر ... يحدث نفس السيناريو ... وكإن ماما فاكرة إني حنسى إني مش بحب سمك البوري ...
في الآخر بكتب ورقة بالحاجات إللي بحبها وألزقها على التلاجة وأمضي عليها
وبرضه ماما بتنتصر ...
وفي الآخر ..بأضطر إني أحب السمك البوري !
ولما أحبه ... وتتأكد إني بحبه وبموت في دباديبه ... وممكن أتجوزه لو عايزه 
... تقوم عملالي سمك بلطي على شان أنا مش بحب البوري
بقيت والله بستسلم 
