بسم الله الرحمن الرحيم !
أنا النهاردة عايز أسئلكم !
حد سمع عن المظاهرة بتاعت الجامعة ؟
المظاهرة إللي نظمها التيار الإسلامي بجامعة عين شمس !
طبعا أنا معرفش هيا كانت عن إيه الصراحة لأني شوفتها من بعيد .... غير أني طبعا مش متابع حاليا أي سياسة !
المهم !
أنا كنت راكب التاكسي ..... وكان في بنتين ركبوا معانا ( هما بين الست والبنت
كانوا رايحين مسجد المصطفى لعمل أشعة بالمجان عشان هما ممعهومش فلوس .... لأن الأشعة تتكلف 250 جنيه ..... ومحدش يقولي عرفت إزاي )المهم ... أول لما وصلنا العباسية .... كان زحمة بطريقة عجيبة !
وشارع الجامعة واقف خالص !
وطبعا الأمن المركزي واقف وسادد الشارع ..... لأن المظاهرة كانت في الجامعة مش برة !
المهم .... لقيت شباب ( روش ) واقف مع بنات ( روشة ) وبيشربوا ( بيبسي ) وقاعد يتريق على المظاهرة قائلا " الله أكبر " بطريقة مثيرة للسخرية !
طبعا أنتو عارفيني في الحاجات ديه .... دمي بيتحرق بسرعة !
طبعا كنت حنزل من التاكسي ..... وروح أشجيه بمعلومات عن تفسير الأية " يا أيها الذين أمنوا لا يسخر قوم من قوم عسى أن يكونوا خيرا منهم "
بس إللي أستوقفني سواق التكسي وهوا بيقول " الله يخرب بيت المظاهرات يا أخي ..... حاجة ملهاش أي لازمة "
ولقيت البنتين .... او الفتاتين ..... بيقولوا " ده أحنا عندنا برضه عملوا قبل كدة مظاهرة .... ومش عارفة إيه الفايدة من كدة غير أن هما يوقفوا الشوارع ويعطلوا المرور
"طبعا ..... لم أسكت !
قولتلها ... هوا سؤال .... التظاهر ده مظهر حضاري ولا مش حضاري ؟
قالتلي إزاي يعني ؟
قولتلها " يعني هل في أوروبا - رمز الحضارة والتقدم - مظاهرات ؟ "
قالتلي أه
قولتلها " في أوروبا .... المظاهرات بتمشي في الشارع وبتوقف الدنيا .... صح ولا غلط ؟ "
قالتلي " أيوة ... بس ... "
قلت " المظاهرة إللي حضرتك شايفاها ديه جوا الجامعة .... وزي ما حضرتك شايفة الأمن محوط الجامعة وموقف الشوارع ..... بس طبعا بما أن الشعب المصري شعب بيخاف ..... جيبتي العيب على المظاهرة إللي هيا جوا الجامعة مش على الأمن إللي برا الجامعة ! "
لقيت السواق بيقولي " طيب حضرتك يا بشمهندس تقدر تقولي إيه فايدة المظاهرات ديه ؟
طبعا أنا عجبتني أوي كلمة بشمهندس وكنت عايزه يقولهالي تاني
قولتله " عشان يعرفوا أن في حد لسة بيقول لأ .... زمان حضرتك .... لو حد كان عمل فيك حاجة ... كانت الدنيا بتقوم ومبتعدش ...... دلوقتي هما عايزين يدوا الناس على قفاها .... والناس تقول " كمااااان " مش تقول " لأ " "
" غرض المظاهرة حضرتك أنها يا أما تحي موضوع أو تفكر الناس بمشكلة أو أزمة يمر بها العالم الإسلامي ..... أو أنها تكون تعبيرا عن الإعتراض ..... أي نعم مجابش نتيجة .... بس هوا مش بيجب نتيجة عشان محدش بيسمع ..... مش عشان هوا غلط ..... في بولندا .... المظاهرة لما قامت ..... وكانت بدأت بمسيرة صغيرة ..... الدولة أجبرت أنها تسمع المطالب ..... أما هنا ..... بيحوطوك بالأمن وبيحاولوا يكتموك "
على جنب يا ريس !
طبعا الراجل كان مصر أنه مايخدش فلوس .... وأنا حلفت وإديته 2 جنيه بحالهم
المهم .....
أنا عايز أسأل !
مش أن الأوان أن ثقافتنا تخرج من إطار جريدة الأهرام ولا جريدة الجمهورية ولا التليفزيون المصري ؟
ليه ماحدش في الأهرام جيه قال " ان المظاهرات السلمية مظهر حضاري كما في أوروبا والدول المتقدمة "
بس تلاقيهم بيتكلموا " عن خلع الحجاب والشذوذ والموضة "
أما آن الأوان .... أن أحنا على الأقل .... نحمل أحترام وتقدير .... لهؤلاء الناس .... إللي بيضحوا بمستقبلهم ..... وبيعتقلوا ..... عشان يوصولوا كلمة لأ للشارع المصري ..... ويقولوله أن لسة في ناس مابتخفش !
إيه إللي جبرهم على كدة في عز الحر ؟
إيه إللي بيجبر حركة زي كفاية أنها تنزل وتتضرب ويعتقلوا ويتعذبوا ..... في سبيل أن الناس تحصل على تعليم أفضل ورعاية صحية أفضل ..... رغم علمهم أن الناس إللي هما بيطلبوا بحقوقهم حاطين رجل على رجل .... ومستنين غيرهم يطالبلهم بحقوقهم .... لأ وإيه .... بيتأمروا !
حد فكر ؟
أنا منزلتش في المظاهرة ..... بس من داخلي متأكد أن هما إيجابيين وأنا إنسان سلبي !
شباب فعلا قدروا يقولوا لأ !
فلأحيي هؤلاء الشباب !
شباب التيار الإسلامي !
وكل الإيجابيين أيا كانوا وأينما كانوا !
--------------------------------
أسامة عفيفي
28-9-2005
ليست هناك تعليقات:
إرسال تعليق