من المواقف العجيبة إللي الواحد بيكتشف فيها أن الشعب المصري ده شعب ساذج , موقف حصلي أنا ومحي وقوصي وفيدو وهما قاعدين بيذاكروا عندي
( واكلين شاربين نايمين عندي ) 
نزلنا نصلي الظهر في المسجد .... ملحقناش الركعة الأخيرة .... فاصليناه لوحدنا جماعة في المسجد 
بعد كدة في صلاة العصر .... ما أخدناش بالنا من الإقامة .... نزلنا برضه متأخر .... ولحقنا التسليمة !
وصلينا جماعة مع بعض 
خلصنا الصلاة .... لقيت واحد بيبص علينا كدة ومراقبنا (ما إحنا 3 مربين دقنهم .... وفيدو كمان سايب دقنه )
بصيت لمحي وهوا بص ليا في نفس اللحظة .... وفهمنا بعض تماما
طبعا قعدت أشاور لقوصي وفيدو ... بإشارات فيما معناها ( إصبروا ... إستنوا ) .... على شان مانخرجش من الجامع مرة واحدة طبعا لا حياة لمن تنادي .... أنا كنت ناقص أمسك مايك وأصرخ وأحلف أننا مترقبين على شان شخص زي قوصي أو فيدو ياخدوا بالهم
المهم .... عند بابا الجامع تلاقينا !
الراجل تفحص في ملامح وشينا .... وبعدين راح قايل " أنتوا مصلتوش معانا العصر ليه "
أنا : " نزلنا متأخرين " 
الراجل : " والظهر ؟ "
محي : " نزلنا متأخرين برضه "
الراجل : " أصل أنا لما شفتكم مصلتوش الظهر معانا ..... والعصر معانا .... جيه في بالي أنكم عاملين جماعة ... فا على شان كدة ماصلتوش معانا "
أنا ومحي وقوصي وفيدو ..... تنحنا لمدة 5 ثواني ..... بنستوعب الكلام ..... وفجأة قوصي أكتشف أن عنده لسان وراح قايل " مش للدرجادي يعني "
طبعا كنا بنتطوح في الشارع من الضحك .... جماعة .... إحنا بقينا جماعة ..........
ده الراجل بيتكلم بجد والله .... ده فضل منتظرنا على شان يقولنا البقـين دول !!
وطبعا إحنا أعضاء الجماعة ..... المرشد ميدو ..... والأمير كوكي .... والكوماندا فيدو .... والخليفة دوسة
جماعة الفسافيس
أي 4 بيصلوا لوحدهم ..... على شان ملحقوش الجماعة الأولى .... سيتحولوا بشكل ما في عرف الشعب المصري إلى لبنة أولي في جماعة منشقة
شعب تحفة صحيح !
ولا يا فيدو .... ماتجيش عندي تاني .... ده أنت شبهتنا يا راجل
ليست هناك تعليقات:
إرسال تعليق