بسم الله الرحمن الرحيم !
طبعا أنا بقالي كتير ماكتبتش !
وطبعا ده يعتمد على عدة عوامل !
فترة الإحباط واليأس وأني مش طايق نفسي ووووو ...... المشاعر التي تجتاح طالب الهندسة ..... إللي صحي متأخر بعد 3 شهور !
وقترة الدرجات الرائعة التي حصلت عليها !
وفترة أنقطاع النت ..... وطبعا الروتر ( عقبال عندكم ) أتحرق !
أنا ما كنتش ناوي أكتب !
لأني حاليا لست أنا !
مش أنا بقيت سامي مثلا ..... لأء .... أنا مش أنا يعني .... أنا هوا أنا ..... بس يبان عليا أني مش أنا !
يعني أنا هوا أنا مع شوية كراهية لأنا الحالي ....... أصل أنا حاليا متغير عن الأنا بتاع زمان !
ما علينا ..... ما علينا !
المهم !
خلوني أحكيلكم على إللي حصل يوم التلات إللي فات !
طبعا ..... بما أنكم عرفين إيه إللي حصلي يوم التلات من الأخ محي أبو فجلة !
فدعوني أقص عليكم القصة من وجهة نظري ! 
طبعا أنا كنت متفق مع محي أني أقابله الساعة 8 ...... وطبعا الباشا صاحيلي الساعة 11 وبيقولي تعالى !
قولت يا ولا يا دايس ..... الولا أول مرة يطلب منك حاجة ..... بلاش تكسفه ...... طبعا لبست هدومي ونزلت على اساس أني حفرمت الهارد بتاعه ...... ويادوب ساعة يكون الجهاز تماما !
طبعا لقيته بيقولي " دايس حبيبي ....... ماتكمل جميلك وتروح الكلية تجيبلي ورق عشان أنا مكسل أنزل "
طبعا قولتله "@ّ^%!$@#^... يازبالة .....$#$@..... أنا جيلك من الـ " ...... " ........ @ّ^%!:؟,؟,ـ،/؟ ..... وأنت مكسل تهز طولك وتتمشى للكلية ...... يا@ّ^%!$#$@)*لآآ:،/ $$:/؟ "
المهم وصلتله ..... لقيته بيتفرج على فيلم عقيم جدا ..... بتاع واحد لابس ملاية ورابطها في قفاه ..... وحاطط على عينيه شراب مخروم .... وعايز يقلد سوبر مان ...... طبعا محي فطسان على روحه من الضحك ...... وأنا قاعد أقوله ..... هاهاهاها .... حلو أوي الفلم .... ياللا نقوم "
-" أستنى والله ده فلم جامد ! نياهاهااهاهاهاهاهاههاهاها "
- " ..........
دخلت غرفة البيه ..... لقيت في كمبيوتر أثري ...... والماوس شبه رجل سلاحف النينجا ..... وشاشة نص بوصة ........ وكيسة مفتوحة ..... وغالبا كان مدلوق جواها شاي ! والكيبورد عليها أطنان من التراب ..... يعني لو وقع عليها شوية بذور وبقليلا من العناية ..... أراهن أن في ظرف أسبوع الكيب بورد حتنبت !
قولت ياد طنث خالث !
طبعا هوا قالي " دايس ... حبيبي ..... الفلوبي ديسك بايظ "
قولتله " عيب عليك ياراجل ..... أنا عامل حسابي برضه ..... مش السي دي روم شغال ؟ "
قالي " أيوة طبعا ..... عيب عليك "
طبعا وصلناه ....... أنه يفتح الباب بتاع الروم ..... أبدا ..... أن درج الأسطوانة يطلع ..... أبدا ...... دخلنا إبر ومسامير ومفكات ...... هوا حالف عليا الطلاق ما أنا طالع ....... وطبعا وأنا بحاول أسحب الدرج .... لمحت أن راس العدسة هيا إللي معلقة الباب !
طبعا كنت حولع فيه بجاز ..... وقولتله ..... " هوا ده السي دي روم " 
قالي " أه ..... ده كان شغال ...... بس هوا بعض الأحيان بيهيس !! "
- " بيهيس بقاله أد إيه يعني "
- " بقاله يجي شهرين كدة ..... بس وعهد الله كان مية مية "
طبعا خلعناه ..... " بما أني خبير ..... قولت ألقي نظرة على السي دي من جوا " ........ في حاجة ناقصة يا ربي ...... وفي الأخر أكتشفنا أن كان في ترس مخلوع ...... طبعا ده بعد لما فكينا يجي 30 مسمار ..... وخلعنا 6 جاكات ...... وطبعا كل ده على حجري !
وسعادة الباشا البيه ...... قاعد ماسيكلي السيدي روم ....!
اللذيذ أن والده دخل وسلم عليا ..... وطبعا غالبا هوا كان فاكرني جاي أزاكر للولا محي ..... طبعا لما عرف ان الكمبيوتر بايظ لقيته بيقلي .... " طب ما تسيبه بايظ ..... أنا عايزه بايظ "
طبعا والدته جزاها الله الف خير جابتلنا بطاطس محمرة ...... قولت ياد إعمل فيها مؤدب ..... وكل واحدة واحدة ..... طبعا متصور أن إللي قاعد معايا ده بني أدم زينا ...... لا ...... لقيته سايبني وأنا في دهاليز السيدي روم .... وقاعد ياكل .... وبيغيظني !
طبعا ناهيك عن التعليقات العظيمة بتاعت محي مثل .... البتاعة ديه ملهاش لازمة ..... هيا السفنجة ديه بتاعت إيه ....... وطبعا إللي هوا مايعرفوش أن ديه كانت أول مرة أفتح فيها سي دي روم ...... طبعا أنا قولت ..... هوا كدة كدة بايظ !
طبعا بعد لما العك إللي جوا السي دي روم خلص ..... والغريب والغير منطقي أنه أشتغل ......
وبعد لما ركبنا السي دي .... نظرت لمحي قائلا " أنا حاسس أن في حاجة ناقصة "
- " وأنا كمان والله "
مش بعد لما أخلص يعود يمدح فيا ويثني عليا ..... لاء .... ده مسك الرموت بتاع السي دي روم ..... وكا شوية يطلع الدرج ويدخله ..... وأنا أقله بس يا بابا ...... بس يا حبيبي ..... كوخ يابني !
ووالدته دخلت لينا " كنتالوب " ..... وهوا بمنتهى الإستفزاز قال " مش عايزين ..... أنا مابحبوش "
قولت في نفسي " ما طبعا .... سعادتك نسفت البطاطس وأنا قاعد محتاس في السي دي روم ..... كمان مش عايزني أكل كانتلوب ! "
صراحة دي ميزة أنه مش بيحب الكانتلوب ..... لأني كنت أكل واحدة وأترك الطبق مطمئنا أنه لن يقدر على الإعتداء عليه ! "
طبعا قولنا نحمل الويندوز !
أبدا !
حالف ما يتحمل !
طبعا طلعلي عم أبو فجلة وبيقولي " أه صحيح نسيت أقولك .... ده في باد سيكتور "
كنت على وشك الصراخ الهيستيري ...... وأني أقوم أضربه ولا أبطحه بطوبه !
طبعا بعد محاولات ميئوس منها ..... زي ..... السي دي روم نحط في أسطوانة 98 مايقرأش حاجة ..... نحط ويندوز ملينيوم نلاقيه جاب ملفات 98 ( أقسم بربي ان ده حصل ..... وأول مرة أشوفها في حياتي ) ...... نجي نحمل مايقومش ....... نحمل النسخة إللي على الهارد نكتشف أن سعادة الباشا ممعهوش السيريال نمبر !
كنت على وشك البكاء ولعن اليوم إللي أنا أتعرفت فيه على محي !
طبعا أتحمل " براحته خالص " وقاعدنا جنب الجهاز يجي 3 ساعات ..... تكلمنا في كل المواضيع .... لغاية لما قرفنا من بعض وقفنا في البلكونة وعرفني على كل من في الشارع ...... والويندوز لسة بيتحمل !
المهم أتحمل والحمد لله !
عشان تعرف بس يا ولا يا محي فضلي عليك !
هشتكنا وبشتكنا يا دايس !
يامشخلعنا ويا مدلعنا ..... قول لعدوك روح أتنيل !
هشتكنا وبشتكنا يادايس !
بس إللي أنا نفسي أعرفه ..... هوا أنا شربت إيه عند الولا محي ؟!
ملحوظة .... أنا داخل بيتنا الساعة 10 بليل ! ..... أشوف فيك يوم يا محي !
فكرني أبقى أعملك بلوك
-----------------------------
أسامة عفيفي
12-5-2005
ليست هناك تعليقات:
إرسال تعليق