أنا عايز آكل ستيك مشوي ياجماعة !!
هتف أسامة ( دايس ) بهذه العبارة .... والتي لاقت ترحيبا شديدا من جميع من في السيارة
.... بل إن البعض قد أخذته الحماسة ... وبدأ بعد مناقب ومميزات دايس 
... كنوع من أنواع تسلية الوقت خلال الرحلة إلي بيسترو مساكن شيراتون ...أشكركم جزيلا ....
إن طبيعتي المتواضعة قد تأنف بعض الأحيان عندما يذكر أحد ما مآثري أمامها ... تحمر وجنتاها خجلا وهي ترى فيدو معجبُ برزانتها .... ثم تنظر في حياء وتعبث بقدماها في بشئ وهمي في الأرض وهي تسمع أشعار محي وهو يعبر بها عن ولعه برجاحتة عقلي
.... يبدأ قوصي في نظراته الباكية وهو يلعن سيارة محي على أنها ليست على القبلة حتى يسجد لله شكرا على نعمة وجودي في الحياة ... أشكركم جميعا يا أصــــ 
- إنزل من العربية ياكلب !
ياللوغد
.... هوا الواحد مايعرفش يحلم شوية .... من الآخر إطفحوا في أي حتة أنا جي معاكوا على أساس أني حاكل ستيك مشوي .. ياريتني كنت روحت ياعم !!وبعد مجاملات رقيقة , وبعد أن تم إغتياب جميع حيوانات العالم .... قررنا الذهاب إلي بيسترو مساكن الشيراتون !!
---------------------------------------------
وصلنا أخيرا !!
بعد أن طلبنا الأوردر ... وأنا طلبت الستيك المشوي الرائع بتاعي
.... بدأنا نتحدث عن وجهة نظرنا في المستقبل المشرق الذي سينتظرنا .... كل منا تحدث عن أحلامه .... وكأن الجيل السابق كان مجموعة من الحمقى لم يفطنوا إلى ما نفكر فيه ... ولكنني أتمسك بالأمل .... ومؤمن تمام الإيمان أننا سنحقق شيئا .... على الأقل قوصي سيحقق شيئا .... ونجاح قوصي نجاح لنا جميعا بالتأكيد !! سننجح .... وسنغير الدنيا .... وسيتغنى الأطفال بأناشيد تذكر فيها أسماؤنا .....وليحضر التاريخ أوراقا كافية ليسطر فيه إنجازاتنا ....... سيبكي العالم قهرا على ضياع وقت ثمين كان لا يشعر فيه بوجودنا
.... سنحرر الوجود من عبودية التخلف .... وسيعلم من في الأرض أنه قد آن الأوان إلى ....- هوا ده عقب سيجارة ؟
عووووقب سيجارة ؟؟ فين ده ؟؟
نظرنا جميعا إلى طبق محي ... كان طالب مكرونة مصنوعة بأشياء غريبة ليس من ضمنها أعقاب السجائر بالتأكيد !!
- ده عقب سيجارة فعلا !!
عقب سيجارة وفي الطبق ... وفي بيسترو .... أمال أحنا بناكل إيه في الشبراوي ؟؟ أكيد عقب السيجارة ده مرلوبورو .....
بدأت علامات التقزز تظهر على وجه محي .... وأخذ يلعن مطاردة السجائر له .... يعني في الجي سي سجاير
... ويطلعلي في الطبق سجاير .... ده أنا بكره ريحيتها ... يطلعلي عقب في الطبق ... حراااااااااام 
طبعا جبنا الويتر ... عقب فعلا ... واضح جدا أنه عقب سجاير
.... أخده من سكات وراح داخل بيه على الشيف .... وبعد مدة ... أتى إلينا ليزف خبر إعتذار الشيف جدا جدا جدا !!!نعم ياخويا ؟؟
الأحداث الجاية ديه معظمها ببطولة فيدو ولسانة الراجح ....
- أنت متعتذرش .... لو سمحت عايزين المدير !
بعد مدة أتى المدير ... وبدأ بالإعتذار وبدأ فيدو بموهبة شخصية ( صايع مطاعم وفاقس إللي فيها ) بالتعامل معه .. وإزاي يافندم .... والمطعم ممكن يتقفل .... وهوا مش ممنوع التدخين .... ومستحيل .... ماتقنعنيش ... أبدا ... كان ناقص يقول ماينفعش ونلاقي يحي طلع من علبة البيبسي
أنا بقى شايف فيدو .... ماشاء الله ... حاجة تفرح .... كل شوية أقول لنفسي .... ماتقول كلمة ... إنطق ... يجي في بالي تعليق .... يا إما فيدو قالوا ... لإما أقول لنفسي إيه الهبل ده .... ده حتى التعليق البسيط الحقير إللي أنا قلته ماكنتش واثق فيه ... " يافندم ده إحنا في بيسترو ... ده مطعم نضيف المفروض "
.... وبعد كدة قعدت أفكر ... هوا إسمه بيسترو ولا بياسترو ؟؟؟
المهم بعد دش بارد في عز الصقيع تلقاه المدير من فيدو .... الراجل حلف ليعوضنا .... وطبعا إحنا مانقبلش عوض !
الراجل صمم ... وجابلينا بيتزا .... وحلويات .... والشيك على حسابه ..... وروقنا آخر ترويقة !!
طبعا قوصي حلف ما هوا واكل حاجة .... وصممنا أننا ندفع ( رغم أني ماكنتش عايزالإصرار على النقطة ديه بالذات
)والراجل أبدا والله .... وطلبنا الشيك من وراه !
طبق قوصي
هوا كان قصده على أنه مش حياكل البلاستيك
وجت الفاتورة ماتشال منها أكل محي ... ومتشال منها الخدمة والضريبة .... وطبعا انا لوحدي كنت نص الفاتورة ( ماقولتلكووووو بلاش تدفعوووا ... لازم الأدب والأخلاق الحميدة يعني )
بس بجد من الأيام الجميلة إللي أنا قضيتها في حياتي !!!
---------------
أسامة عفيفي
17-1-2008
احلي حاجة في الدنيا الاصدقاء خصوصا لما يكونوا فاهمين دماغ بعض ..
ردحذفولكنني أتمسك بالأمل .... ومؤمن تمام الإيمان أننا سنحقق شيئا.. D:
الي الامام ثورة ثورة:)!