كنت متفق مع 12 واحد أن إحنا إن شاء الله حنبقى إيجابيين وننزل ميدان التحرير .... ونطالب بحقوق الشعب ... 12 واحد أكدوا عليا تماما أن هما نازلين ... غير بتاع 10 كانوا ميديني ريق حلو ...
ليلة الإضراب ... موجة من المرض والإنشغالات أصابت ال22 دول ماعدا واحد بس ...
يوم الإضراب ... نزلت أنا وهو وواحد من السايت هنا ( مش حقدر أذكر أسامي على عشان محدش يضايق
) .... إلى رمسيس ... البلد فاضية ... المواصلات فاضية ... وأنا راكب أصلا في أتوبيسات كنت بحلم إني ألمسها مش أركبها ... لا قعدت فيها وتلات تربعها فاضية .... المحطات فاضية والإزدحام شبه منعدم !
المهم وصلنا رمسيس ...
مافيش غير أمن مركزي !!!
أمن أمن أمن أمن ......... يااااااااااااااااااااااه ..... ولا كأن مصر في حرب ....
كانت نقابة المحاميين عاملة إضراب كدة صغير .... والناس مش كتيرة .... طبعا قلنا ... ديه أبتدت تندع
... ده إحنا حنلاقي التحرير ولعة !!كملنا مشي للتحرير ....
ودخلنا ميدان التحرير ....
ولا بني آدم ....
آه ياولاد الشعب
...فين الناس ...
فين الشعب ؟؟؟
على رأي عادل إمام ... أنا حمعل إضراب لوحدي أنا ولا إيه ؟؟
الأمن المركزي بيمنع أي تجمع من 3 أشخاص .... إحنا تلاتة محدش يكلمنا لو إحنا ماشيين .... أول لما نقف ... نلاقي ناس لابسة مدني يقولولك إمشي لو سمحت من هنا ....
كتائب أمن مركزي .... عشرات العربيات ... جتلنا أنباء عن إعتقال ناس من الجامعة الأمريكية .... كتائب من البلطجية ( أيوة كتائب .... واقفين زي الامن المركزي ) .... لواءات .... الناس كلها ماشية تبص لبعض .... كله شاكك أن التاني زيوه جاي على شان الإضراب
.... بس محدش قادر يتحد مع حد ولا يصارح حد على شان الأمن إللي لابس مدني ...لدرجة أن إحنا التلاتة بس مرينا على كتيبة كاملة من ظباط أمن الدولة ... قعدت أقول لصحابي : طلع العلم ( علم مصر يعني ) وإحرقوا
المهم إللي كان معانا مشي .... جاله إحباط ويأس ياعيني
... وإتبقينا أنا وصاحبي في ميدان التحرير شوية ... رحنا أكلنا كشري والدنيا آخر حلاوة 
...ملقيناش حاجة نركبها من التحرير ... أتمشينا تاني لحد رمسيس ( الكلام ده كان على الساعة 2 )
رحنا بقى لقينا الدنيا ولعت في نقابة المحاميين ... الناس كترت أوي ... بس طبعا الغباء أن هما بدأوا الإضراب جوا ... ففضلوا جوا ... الأمن المركزي متجمع عليهم ... منع المضربين من إن هما يطلعوا من النقابة .... اي تجمهر أو تجمع قدام النقابة يتم إجهاضه بسرعة .... وقفت أنا وصاحبي ... نفكر نشوف حنعمل إيه ؟؟ ... يادوب وقفنا جالنا ظابط ... قالنا ياتمشي ياتخش جوا ( قصده على النقابة يعني ) مع زمايلك !!!
بجد ؟؟؟
ينفع ؟؟
لقيت أن هما عاملين ممر صغير كدة محصور بين كتيبة الأمن المركزي وسور النقابة .... تمشي فيه وآخره مدخل النقابة ....
طبعا دخلنا وإحنا متوقعين إن حد حيضربنا وإحنا داخلين ... بس محدش كلمنا ...
الناس جوا النقابة ... فوق بعض ... كتيرة أوي ... بس المكان ضيق .... وكانوا واقفين في السطح ... رحنا طالعين معاهم ( وطلعت علم مصر أخيرا ) والصحافة كانت فوق والجزيرة والبي بي سي العربي والدستور والمسائي وكام قناة كدة معرفهمش ( اصل معنديش دش ) وعملوا لقاء مع الناس إللي فوق السطح إللي في النقابة ...
وأثناء ذلك تجمعت أكتر من بؤر للشعب خارج النقابة .... وأبتدا الأمن يتعامل مع الأمر بقسوة ... بس كله كان تحت السيطرة وصراحة أنا مشفتش حد إتشد ... والامن كان بيتعامل مع الناس بصورة قاسية بس غير مؤذية ...
وبعد فترة برضه تجمع الناس تاني والمرادي كانت أكبر ... برضه الأمن أجهض التجمع ... بدون أن أرى أي إعتقالات ...
والموضوع ده أتكرر ... وعلى قبل العصر كدة .... لمحت أن في ناس يتجمعوا .... والصحافة صورت... والناس أتشجعت وقربت من النقابة .... بس مكملوش كتير .... الأمن زقهم وأبعدهم بس الموضوع أخد وقت ونجحوا في إجهاضه برضه وبدون أن أرى بعيني أي إعتقالات واضحة
طبعا الموضوع بعد العصر أو أثناء الأذان سكن تماما سواء من النقابة أو الامن .... وحسينا ان الموضوع مش زي ما إحنا كنا متخيلين .... وعرفنا إن الإضراب ( الوقفة ) فشل ( في رأيي ) وأن الإضراب السلبي ( الناس قعدت في بيتها ) هوا إللي نجح بقوة ( رغم أنه مش مؤثر زي الإضراب الإجابي )
طبعا مشكلتنا إن إحنا نطلع من النقابة ... يعني أنت داخل عادي بتكون وسط الناس ... وأنت خارج بتكون لوحدك وتمشي على رصيف كله ظباط أمن دولة وأمن مركزي وبوليس .... بس خرجنا زي ما دخلنا .... محدش كلمنا ولا وجه لينا أي سؤال .... لدرجة أني إستغربت أنا وصاحبي ...
أنا بنقل الصورة زي ما أنا شفتها ... أكيد مش حفتري على حد ... ولا حقلل من حد ... مش معنى أني كنت عايز أضرب ... أني أخترع قصص على شان أبين أن الإضراب نجح .... الإضراب فشل فشل ذريع ( وأنا كل ده بتكلم على إللي حصل في التحرير والنقابة ) ونجح نجاح باهر الإضراب السلبي في توجيه رسالة قاسية إلي الحكومة المصرية
والدروس المستفادة من المغامرة ديه ...
1- ما تزال ولن تزال قوة الإخوان المسلمين هيا القوة العظمى الأولي والثانية والثالثة المعارضة .... وبتبعها حزب الوفد .... والإتنين دول مشاركوش في الإضراب لأسباب هما ذكروها ... وبالتالي جزء ضعيف من المعارضة هيا إللي كانت شغالة
2- وزارة الداخلية المصرية نجحت في إرعاب الشعب المصري .... وإن الشعب المصري لم ولا ولن ينجح في المطالبة بحقوقه إلا لو كسر هذه الرهبة .... وأنا مكنتش خايف من الأمن المركزي قدر قلقي من البلطجية
3- إنقسام الناس في ماهية الإضراب ( هل هو إضراب سلبي ( بيتك ) ولا وقفة ) والناس إستسهلت الإضراب السلبي وأعتقد أن عامل سوء الجو كان ليه تأثير كبير في رجحان كفة الإضراب السلبي !
4- موضوع الإضراب أنا بديه 8\10 في الدعاية و0\10 في التنظيم بين قوى الشعب الكبرى
5- ليس معنى فشل إضراب التحرير أن الواحد تراجع عن الفكرة ... بل على العكس أن الواحد يشوف بيعينه بجد بتيديك خبرة غير عادية .... سواء كانت المبالغة في بعض المعارضة .... أو الإجحاف والكذب إللي في جميع صحف الحكومة .... الواحد بيكون فكرة عن الناس إللي مضربة .... وطريقة تعبيرهم ... وتعاملهم مع الأمن
6- الإضراب إللي حصل في المحلة ده والأحداث إللي حصلت في المحلة صحيحة تماما ... وموضوع أن الإضراب فشل في المحلة ده صحيح .... وأن العمال راحوا الشغل ده صحيح ... وإن هما ثاروا بعد كدة ده صحيح ... وإن حصل مناوشات بينهم وبين الأمن أدت إلى حرب ... ده صحيح .... وإللي بيقول أن الموضوع منتهاش على كدة ولسة الموضوع حيكبر بسبب الأطفال إللي أتأذت بسبب سفالة الأمن .... أعتقد أنه صحيح
7- تضامن بعض السياح ووجودهم في جو الإضراب وتصويرهم للأمن والمضربين والتغطية الإعلامية الجيدة من ضمن أسباب تعامل الأمن بشكل أفضل بكثير جدا جدا من المحلة
أسامة عفيفي
7-4-2008
ليست هناك تعليقات:
إرسال تعليق