الساعة 12 الظهر
التلفون رن ... والغريب أن أنا مكنتش عامله سايلنت ... وكأني حاسس أنه حيرن 
... صحيت من النوم مفزوع ورحت قايل ...
- ألو ؟
* ألو ... أيوة يا أسامة
- أنت مين ؟ 
* أنا عاصم يابني ؟ 
- عاصم ؟ ( واضح أنه عارفني ؟ ) .... أيوة ... إزيك يا عاصم
* أنا بتصل بيك على شان عندي ليك خبر حلو ؟
- بجد ؟ ( كنت فاكر أن المصيبة إللي أنا متكوع فيها أتحلت وهو بيبشرني )
* أنا عازمك على الخطوبة بتاعتي ؟؟
- بجد والله ؟؟؟ الف ألف ألف مبروك .... ( عاصم مين ؟؟ ) .... ربنا يتمم بخير يارب .... بجد ألف ألف مبروك فرحتني والله ( هوا مين بجد عاصم ده ؟؟ )
* مسألتنيش يعني ... مين العروسة ؟؟
- مين العروسة ؟؟
* راندا
- ....
* ....
- بجد والله ؟؟؟ ألف ألف ألف مبروووك يابني ... يازين ماخترت ( عاصم مين ؟؟ راندا مين ؟؟ وبيعزموني بصفتي إيه ؟ )
* إن شاء الله الفرح بلا بلا بلا ....
- ( راااااااااااااندااااااااااا .... كيوووووت كاااااات يعني .... أنا عرفت العروسة ... عاصم مين بقى ؟؟ ) أكيد ححضر طبعا .... أنا أقدر أفوت حاجة زي ديه ؟؟
- سلام
* سلام
--------------------------------------------------------
بعد المكالمة أتصلت بمحي ... عاصم مين ؟؟ طلع Mass ... يابن اللذينا آمنوا 
.... وقاعد ذللني طول المكالمة 
... ماتقول ماس وكيوت كات وتخلص ... في بتاع 50 عاصم أعرفهم ... كويس اني مقلتلوش : أنت طالب كام ؟؟ أنت تعرفني ياكابتن ؟؟
--------------------------------------------------------
الخطوبة سوبر تحفة ... بجد رائعة ... الأكل رائع ... الواد وليد أول لما شاف البوفيه الدمعة نزلت على خده ... الواحد أكل لحد لما طرشأ .... أي نعم أحنا كنا فضيحة ... بس أكيد عاصم مش بيتعلم ببلاش ...
بس الأكل كان فيه حاجة ... بجد والله .... العيال طلعوا شوية مواهب ... وكأن كل واحد أكتشف فجأة أن عنده وسط ... مواهب الرقص المتقدمة طلعت ... بعد كدة فار البركان الخامد ... والعيال أتجننوا ... والواد فيدو حسيسني أنه طلع من مصباح علاء الدين .... وكأنه كان مشحون طاقة هلاسية وفرغها فينا ... والواد يحيى قاعد بيضرب قنابل في الجو .... وكان ناقص يطلع يقول ... فحيا الله هذا الشعب الصامد ... الصاااامد ... الصااااامد .... رقاااصه ... دلاااااعه ....
مسخراااااااااااااااااااااااااااااااااااه
بجد أنا مضحكتش بقالي كتير بالشكل ده ...
---------------------------------------------------
بجد ألف ألف مبروك يا عاصم ... الف مبروك ياحبيبي ... ربنا يتمم بخير .... أنت خطبت أختنا ك
... المصدر والمنبع للمادة الخام للطيبة .... ألف ألف مبروك يا راندا ... ربنا يتمملك بخير ونفرح بيكم في الفرح إن شاء الله ويكون في أكل ووليد يكون مسافر ....
بس مفاجئة غير متوقعة .... فعلا والله .... بجد أنتو لعبتوها صح .... وقاعدين منيمني 
... وحنبلط سوا ... ماشي ماشي ...
---------------------------------------------
السايت بيتآكل ياجماعة .... نصيحة كل واحد يحذر من صاحبه .... ويركز في دراسته ... الأصحاب مش باقيين لحد ... أول لما الواحد يتخطب أو يخطب ... بيتحول لكائن تاني ... ودانه بتطول من كتر التنفيض لأصحابه .... امال لو أتجوزوا حيعملوا فينا إيه ؟؟
أنا متخيل قوصي مثلا ... حيعمل عملية تجميل ... وحيغير نمرة الموبيل بتاعته ومش حيديها لحد ... ونمرة بيته حتبقى بإسم إبن خالته على شان محدش يجيبه من الدليل .... وحيغير نمر العربية .... ومش حستغرب لو عرفت أنه أصلا مسموش محمد أحمد القوصي ... يمكن يكون إسمى مصطفى إبراهيم هلال ... بس هوا خلانا نناديه بقوصي ... على شان لما يبدأ حياته الجديدة يستخدم إسمه الأصلي
إللي يغيظك بقى في الموضوع ... إن إيميله : فرندز فور إفر .... آه ياكداااااااب ....
أنا لو منك كنت عملت إيميل بإسم :
friends_4_ever_till_I_get_married_after_that_tfooo_3ala_my_frnds_1@hotmail.com
ولازم 1 إللي في الآخر ديه ... على شان إيهاب يعمل نفس الإيميل بس برقم 2
أو إحنا ممكن نعمل دومين نيم للخاطبين ...
يعني إيميل قوصي :
koucy@tfoo_3ala_my_frnds.com
وإيميل العزاب
Dayes@3ala_gossety_ya_Waleed.com
