سأحكي موقف حدث لي في وأنا في إمتحانات الشهادة الإعدادية !
كنت أدرس تبع السفارة المصرية في المملكة العربية السعودية بنظام مشهور هناك وهو " أبناؤنا في الخارج " والذي يمتحن فيه الطلبة بدمج الترم الأول مع الثاني في إمتحان واحد وهو من المأسي الذي عانينا منها !
وكانت السفارة المصرية في الرياض .... ولهذا أضطررت أن أقيم عند أحد أصدقائي المصريين والذي يدرس بنفس النظام
المهم .... كان عندنا أمتحان جبر 
!
ذهبت إلى الإمتحان ومعي ألة حاسبة كأي طالب محترم عنده أمتحان جبر!
دخلت اللجنة ...... وجلست في مكاني ..... وأجد صديقي الجالس أمامي يلتفت ويسلم علي .... ولفت نظره الألة الحاسبة ... فقال لي مازحا " أنت حتعمل إيه بالألة ديه .... إيه .... حتحسب بيها التاريخ ؟؟
"
طبعا .... نظرت له نظرة ذات معنى خاص .... ورسمت على شفتي أبتسامة باهتة وأنا أقول " أه يا عم الظريف 
وبدأ تسليم ورق الإجابة !
وإذ بطالب يسأل المستر قائلا له " مستر أنا بدل ما أكتب المادة دراسات إجتماعية كتبت عربي "
ضحكت في سري وأنا أهز رأسي قائلا " اااااالله العظيم .... هي هي هي هي ........يعني مسطول وقلنا ماشي .... وكمان حمار !! "
طبعا لكم أن تتخيلوا شعوري عندما رأيت ورقة الأسئلة مكتوب عليها : المادة دراسات إجتماعية !
عندها علمت من هو المسطول ومن هو الحمار في هذه اللجنة !
إنه أنا وصديقي العزيز !
مبصيناش على الجدول عدل .... وقعدنا نذاكر جبر وفي الأخر إمتحنا دراسات إجتماعية في إمتحان الشهادة الإعدادية !
وربنا سترها !
أسامة عفيفي
3/5/2006
+++++++++++++++++++++++++++++++++++++++++++++++
من المواقف العجيبة التي مرت في حياتي .... كانت مرة في فيصل ... أيام ما كنت ساكن في فيصل .... وكنت ساعتها في 3 ثانوي !
المهم أصحاب ياسر ( أخويا ) كانوا جايين من الأسكندرية ... وبما أن إحنا قاعدين لوحدينا فجم قعدوا عندنا !
طبعا أنا معرفهمش خالص 
المهم ... جم عندنا .... كانوا حوالي 7 أفراد !!!
المهم .... في واحد كان تبت جدا ….بارد أوي وشخصية عايزة الإعدام غليا في الزيت … المهم الشخص ده راح مرستأ نفسه قدام الكمبيوتر بتاعي .... وقاعد يلعب عليه ... وأنا بكره أن حد معرفوش يعد على الكمبيوتر بتاعي !
المهم وقفت جنبه .... رخامة يعني .... وهوا والله العظيم ولا كأنه قاعد في بيت أبوه .... وفجأة بصيلي كدة بنظرة أرف .... وراح مطفي السجارة في كوباية الشاي 
.... وراح مشاور على كوباية الشاي وقايلي ... شيل أنا خلصت !
نعم يا روح …… ؟
طبعا أنا قاعد بتخيل نفسي وأنا ماسك كوباية الشاي وبكسرها على دماغه !
المهم .... رحت شايلها وأنا حاسس بشعور سيندريلا نحو مرات أبوها ... ورحت رايح شادد أخويا من قفاه .... وعلى المطبخ .... وروحت سأله مين داااااااااااااه ؟؟؟؟
قاللي معرفش والله !!
رحت فاتح باب المطبخ .... وشادينا واحد من صحاب ياسر من قفاه .... وسألناه مين ده ؟؟؟
قالنا : معرفش .... هوا مش تبعكوا ؟؟ 
طبعا سألنا كل أصحاب ياسر ... محدش يعرفوا !!
أنا بقى قاعد أقول ...سيبوهولي .... هيا إيه ؟؟ مراحيض عامة ؟ ... ده أنا حطلع عينه !
المهم حاصرناه .... وهوا قاعد على الكمبيوتر .... بتاعي ... وأنا ولا أجدع محقق إف بي أي .... بقول ... محدش يلمس الكومبيوتر ... نبعده عنه ونهجم
المهم الواد بعد إستجوابات .... طلع في الآخر قريب صاحب صاحب ياسر .... قابل صاحب ياسر على مدخل العمارة .... وبعد كدة صاحب ياسر راح مشوار ... فا لاقى ناس طالعة .... راح طالع معاهم !!
طبعا لكم أن تتخيلوا أن في تلاتة كانوا ماسكينى وأنا قاعد بقول : سيوووووووونيييييييييييييي علييييييييييييييييييييه !
![korsy[6]](https://blogger.googleusercontent.com/img/b/R29vZ2xl/AVvXsEjDRycdnQDg3AZEID4Kk2KykoyourL1887DN9WPxCYZ32WxSGznn8RXXFVqBs1FSAjT6PbDa42gH7qpcTBCigjYBekFITjky4iTYuI0upWf2SCjrXfb4-S7BV0gvV5aae8QVqVAOGelSrE/s1600-h/korsy%5B6%5D%5B2%5D.gif "korsy[6]"){kind=small}
أسامة عفيفي
12/7/2007
------------------------------------------------------------------
حصل النهاردة حتت دين موقف ... مسخرة !
بعد عذاب من اللف والدوران في مدينة نصر ... على شان بندور على لحمة نشويها
المهم .... الواد سقراط قاللي ... ما نيجي نجيب من سوبر ماركت كدة في سيتي ستارز
( مش فاكر أسم السوبر ماركت الصراحة 
)
المهم ... وإحنا داخلين المول .... لقينا راجل كدة ... طول بعرض بإرتفاع ... لابس بدلة ... ومعاه كدة زي لاسلكي إللي بيكون مع البودي جاردز .... وبيقولنا ممنوع الدخول !
أنا صراحة كنت فاكر بيقول على شان الدقن الخفيفة إللي أنا مربيها
فا بقوله ليه ياعني ؟
قاللي ممنوع دخول الشباب !!
بصيت أنا لسقراط .... وبعد كدة بصينا حوالينا .... لقينا يجي 100 شاب داخلين المول
فا قلتله .... أمال دوول إيه ؟
قاللي دول يا عائلات .... يا كابيلز !
طبعا علقت تعليق كدة .... مش حينفع أقوله على السايت وقعدت أفهم في الراجل أني داخل أشتري لحمة .... يعد فترة الراجل إقتنع بالنظرية .... وقعد يهزر معانا .... ويقولنا " طب حتدوني لحمة ؟ "
ما علينا !!
جيه اليوم إللي يجي فيكي يامصر .... أني أحتاج أن يكون معايا بنت على شان تدخلني المول !!
عمار يا مصر !!
أحسن حاجة وإحنا بنحاسب في السوبر ماركت .... بدي الست 350 جنيه .... لقيتها راحت رافعاهم لفوق وبتشوف هما مزورين ولا لاء 
أي نعم أنا شكلي وسقراط عاملين زي المتشردين ..... بس مش للدراجادي يعني !!
أهم حاجة أننا جبنا اللحمة .... جبنا اللحمة ولا جبنا براميلي ؟؟ … نياهاهاها … ما علينا
أسامة عفيفي
2/1/2007
-------------------------------------------------------------------------------------------------------
جاتلي رسالة من نمرة غريبة بتقول : أنا بحبك يابابا
بابا مين الله يخرب بيتك ... هو العالم كله مُصر يفكًرني ويغيظني
تأملت كلمات الرسالة جيدا ... ثم جال في خاطري إني أشيلها على شان لو وقعت في إيد خطيبتي ممكن التفسير يكون صعب , خاصة أنا لما بكون برىء بيبان إني مذنب بشدة ...
إيه ده ؟؟؟ صحيح أنا مش خاطب !
خلاص ... أحتفظ بالرسالة بقى براحتي ....يمكن يكون إللي باعتها يكون إبني إللي جاي من المستقبل ولا حاجة !
أسامة عفيفي
6/5/2009
ليست هناك تعليقات:
إرسال تعليق